買少見少既柴油的士

政府提倡石油氣的士, 加上有資助買新車, 令唔少車主轉用石油氣車.

不過仲有車主依然堅持用柴油車, 直至架車拎去劏為止.

現時既柴油的士數目得個位數字. 大部份既狀況不俗, 相信係當時政策公佈前既最後一批新車.

由於政府收緊車輛廢氣排放標準, 加上訂立法例規管, 呢d車會在死氣喉加裝廢氣消減裝置, 以為滿足相關既準則.

雖然呢d車仲可以在街度見到, 只不過代理唔會再入柴油的士, 呢批車隨著佢既使用期限, 遂漸走入歷史.

荊棘滿途既澳門通

今日, 澳門通終於可以兩巴通用.

前身係新福利IC卡既澳門通由康澤科技研發. 初時只係在新福利其下路線使用. 雖然澳門科技大學接駁巴士都係用同一個系統來收費, 但係新福利IC卡係唔可以在澳科大巴士上使用.

只不過自1999年開始, 服務範圍只係在支付巴士車資.

同香港八達通有限公司唔同, 雖然兩者都係以由公共交通工具發起, 以及支付車資為主, 但係八達通公司並唔係under某間公交公司, 而係獨立運作. 在日後既市場發展更有利.

後期IC卡既由巴士公司附屬系統發展到獨立金融機構. 依家澳門通既應用範圍同香港八達通差唔多. 不過由於卡由新福利移交出黎, 而便利店既合作仍未開展, 購買同增值仲係依靠門市或合作既院校, 令到卡既方便程度大大減低, 可能在儲值卡既銷售未如理想.

待數碼化既雷達偵速機

琴日警察示範用雷射槍俾立法會議員睇果陣, 透露左會引入數碼版既雷達偵速機黎試. 咁依家用緊既機係點樣呢??

好多司機都會留意有冇快相機, 但係好少會見到部機係點. 因為大多數都會在高處（例如天橋)或者在較隱蔽既地方（例如車輛匯合處既影線區）放置, 多數會有警員駐守, 而在冇幾遠會有路障截車.

在今年既教職博覽, 警察就放左部「相機」俾人睇.


睇真d, 真係有部相機在雷達上面. 外表好似舊式既機械菲林相機, 不過係冇左觀景窗.


部機既背面.


呢部機一出動, 就要帶齊第1幅相既野. 由於d野又多又大件, 每次出動都要用車運. 唯一好處係, 用呢部機唔一定要有路障配合, 可以淨係用相黎檢控.

部機既工作原理可參考: http://www.hiplick.com/detector-online/SpeedCheck.htm#radarcheck

台灣國內線隱憂

近排比較屬目的航空新聞就係遠東航空財務困境, 最近發展係因為又再次出唔到糧俾員工, 航空公司既負責人引疚辭職. 不過近日台灣報紙既報導可能令遠航情況雪上加霜.


有報導指有12名遠航國際線機師因為英文考試唔合格俾台灣民航當局勒令停飛國際線, 直到合格為止.

件事在香港發生既話, 機師就會冇工返, 因為香港既航線全部都係國際線,以及所有飛機同控制塔溝通都係用英文. 不過在一d有國內線既地方, 仲會容許機師同控制塔溝通用返母語. 所以遠航果12位機師仲有工返.

如果機師既英文唔好, 好容易同控制塔有誤會. 少則好似國航機師咁在紐約甘迺迪機場搞出笑話, 重則既話會機毀人亡, 真係笑都笑唔出.



雖然12個機師話多唔多, 話少唔少. 不過台灣國內線航空公司國際線係冇駐目的地既機組人員, 呢次情況唔多唔少會在人手編排更緊張, 加重機師工作量.

仲有咩車揀??

豐田話唔出5座位既士, 令業界擔心要局住用4人車, 影響生意云云.

以前既競爭對手: 日產依家仲有出5座位既Cedric LPG的士. (參考網址)


不過d司機話零件貴, 架車又冇豐田咁好. 我諗佢地都唔會再用.

咁其他廠呢??

講真, 如果話係專門生產線既車廠只有日本既豐田, 日產同理韓國既現代. 而5座位版只係得日產.

有人提議用Hiace改做LPG車.


當然, 依家既LPG車都係改返黎, 不過架車大架左, 唔知會唔會重演澳洲福特事件...


回望神洲, 廣州都開始一要d的士行LPG, 不過d車連國2標準都唔到...連國貨都唔洗用.

再見5座位金豐

豐田作為香港的士既主要車種, 呢次既改動成為琴日新聞報導既焦點之一.

根據豐田日本網頁, 新一代既金豐石油氣一如報導咁只係坐得4個客, 而「軚波」亦改返在地台上面.

新車係用馬力達79匹既3Y-PE引擎, 屬2000cc水冷直4引擎. 金豐有自動波同手波版本. 自動波版本配有over-drive既4前速波箱, 同時有SG, standard "Deluxe package"同standard 3種車箱級別. 而手波版為5前速, 車箱級別只有standard "Deluxe package"同Standard 2種.

圖片可以到豐田官方日本網址睇下.

雖然呢次係一個正常既車款改變, 不過卻引起香港的士業既回響.

3雄頂立??

琴日, 蘋果報導話香港機場會起鐵路去深圳機場, 加強兩地機場互補wor...

其實,在珠三角入面, 5個機場唔係各位其司, 而係互相競爭, 又或者係尋求出路. 呢次合作, 令有「5A」之稱既民航勢力更加明朗化.

曾經一枝獨秀既香港國際機場 (VHHH)因為廣州白雲國際機場 (ZGGG)既擴展同理受惠於中國航權開放, 在國際線既客貨運不斷挑戰香港, 加上本身有國內航線既優惠, 令香港機管局要諗辦法解決.

同香港相反既深圳寶安國際機場 (ZGSZ)面對粵港兩地既國際線競爭顯得無力應付, 不過因為深港兩地各取所需, 已經在海陸兩方面加強合作, 吸引轉機客同本港市民使用深圳機場. 因為港深機場較近, 仍然有能力合作與廣州競爭.

同樣係國際機場既澳門 (VMMC)既先天狀況比粵港兩地差. 不過由於佢既低廉停泊及降落費, 吸引唔少廉價航空公司飛去澳門, 以亞洲地區為主. 加上博彩事業既幫忙, 令澳門機場在客運上有與別不同既定位.

至於屬地方機場性質既珠海三灶機場 (ZGSD), 情況比寶安更糟, 因為只有少數國內航線服. 在香港機管局入主後, 情況有所改善. 三灶機場既出路似乎係香港機場既幫手, 加強西部航點既聯繫, 以及分擔部份貨運工作.

在5A入面, 澳門暫時可以獨善其身, 而香港, 深圳同珠海已加強合作, 人氣急升既廣州點會坐視不理. 睇黎勢力分佈似乎出現3雄分立局面, 日後競爭將會更激烈.

代表車

網路世界雖然係隱姓埋名, 但係為求人地知道邊個打邊個, 在username度會搞搞新意思.

部份上討論區既巴士迷會用「代表車」代表自己. 佢地可能用車牌或者車隊編號做username.

每人揀車做代表既原因都唔一樣, 唯一既共通點係唔會重覆代表車. 雖然係不成文既習慣, 不過總有侈外.

我既代表車就係屬於九巴配Northern Counties車身既Dennis Dart, 車隊編號係AA48, 車牌係GS9019.

我既原因係架車在九巴得1001架, 而且第一次見佢感覺好特別, 所以搵佢做代表車.

得意既係, 在我上開既討論區都有個板友用同一架車, 真係好少見...

近排, 有d航空迷都會用航機註冊編號做username, 不過仲係少數人既選擇.

歡迎光臨

各位好!

呢個blog主要係介紹一下我鐘意既野: 交通工具. 包括飛機, 巴士, 救護車咁.

唔少得既係介紹呢d交通工具既功能同種類.

仲有, 我會分享近排發生既事既睇法.

雖然呢個blog既外觀係較為簡單, 不過我會遂漸更新版面, 希望各位多多支持~!!